Karbi atum angtan damde te chongdat athai avelo ma?

Karbi Anglong district thakthe aprang puseta India angkangpi angbong 736 district pen pangbar lote Karbi Anglong district adang ke kethepik a district pu ke kali athe India arlo thetan-thetan a district penang dolang. Akethenai a district ke Gujarat state arlo Kutch pu a district lo. Laso a district adang kethe 45,652 sq km do lapen amuluk ta 20,92,371. Lasonsi Arunachal Pradesh arlo a district amokha Karbi Anglong a district pen adang bichet puseta chingbarkre-chingbarkre ke do. Lahai along amuluk ke-ong lapen a density mate monit kedo kachinglumsi langdam nangji. Non langdam lonang India pen adang amuluk ke-ong a district arlo amuluk kanglum ke kilometre isi avaikang arlo (Square kilometre) bang 20,000 pen 30,000 anta do. Lahai a district atum ke lasi industry lapen corporate saihem mate beha ke-ong adimsi kerengji aphan choklem dam nangkok ajok halahai adimsi chongvir dam rinti lo. Lasonsi lahai amuluk ke-ong adim amonit atum ta tangka kelong ke-ong adim pura ha angtan adetsi chongvir damlo. Lason ajok lahai amonit atum kedam lapen industry lapen corporate saihem mate beha ke-ong ajok monit akenang thetan amat jonghe le monit dam seta dorde athe lahai adim along monit akenang ke-ong ke labour class amonit lapen lahai adim along kedo barim atum ke kacharli kihungsoi lapen atovar kachini et ajok kacharli kedo–o rinti lapen konat ma tangka ke-ong adimsi kat lap lo. Lahai dim ke ladak ili Karbi Anglong pen danglok kapaphi adim, pulonang monit ke nangchan bom seta hala kachoklem ke athai kave pu amat chongvir dam rinti lo. Lasi non kethetan alam abang kelang dam nangji ke ahok-ahak ladak ili kachongdat adim ave ma? Mate ha kachongvir dam adim along tangka kelong ong munak ma? Mate kopene akerengme do ma? Neli kelang lapen kamunthi dam pen kelong ke ladak ilitum adim ke bang angtan chongvir damde seta keklem adim lapen kachongdat adim do. Isivet alam, ili kamatha dam nangji ke akethenai lo, non kedamtang apor ahut anke kamatha pangching pen ili bidi abang asai kapavangve ajoksi keklem mate kachongdat adim ave pukok. Kachongdat adim ke emethangsi matha pame pen cheselam nangji. Bang adim lapen bang along kachongdat ke bang arum kedo lapen bang nang kelangrem pen kachingtang nang ke theklor lo athe bang atam ke inghor un vek nangji, bonseta ratpangri a chokamar pulote cheparoka long pame. Non ili ke bang nihang-nirep ahavar a state Nagaland, Manipur, Mizoram ason-ason pen ke pangbarno. Lahai a state along ke monit atum kachongdat athai ave puke ahok athe Nagaland arlo ta inglong lapen arlong a inglong ke-ong munak ajok kachongdat pu chot ta kali sai chotikiji puseta adim ave. Lahai ke inglong amat thetan lapen kachingthurji aphan kachoklem aphan akisung do athe monit aphai ta jumpi. Lasonsi Manipur pen Mizoram heihui arlo talo, seta Karbi Anglong arlo ke sai chotiki adim ta longle dopik lang. Laso aphi ke ili methang kachoklem nangji adim bang aphansi pek lap. Pulonang arnivang a labour lapen mistry heihui le ili cheklem et pu anta adim dopik jilang. Lasonsi ason-ason abeha pachingthur nangjilang. Ladak akenangsotnai ke honesty and sincerity mate athikjot lapen kachongthuithe. Laso aphi abang ke kaseletle, kinirsip pen ning kiding henlo. Laso abang jongsi ning chibi pame pulote labour pen danglok beha anta chingthur unpo. Lasi kachongvir mate kachongdat dam ta bang keklem ason kacharliji aphansi kedam pulote lake kemepik alamlo lapen kachingthur aphan kedam puta mepik alam lo athe ajahak ason ke ladak choklem athai ave, seta longri along vang pen bang kacherailap adim methang nang kacherailap adim nangcherai nangji. Non Karbi Anglong arlo ili minority si nangcheman bomlo. Lasi bang pen ili ke kachepangbar ason chingbarbe athe bang atum ke amethang adim keklem athai kave ajoksi bang adim kedam. Pulonang India pen angtan ta damlo, seta dak ilitum adim ke ili kacheklem nangji adim bangsi cherailaplo. Lasi halaso ahin pen matha pen langdamsi asap kache-o abang do nangkokpo. Non lasi angtan kachongdat atum methang adim vang pen pachingthursi la bang angtan amonit keklem adim methang klemsi methang adim chepangtang nangpo.      

Kachithik mek thekthe ajok kisung nang

Kachethangplup COVID-19 pen kachepajokji aphan pura det adangpi arlo ta Lock Down kipi pen keboidet arat kisung chethan un eh an chingtang nang lo. Bangso apor ahut kisung dun ke kaike asonsi kavedet atumsi sungdun nanglo. Laso angbong ajahak atum ke kapangkre ta do lapen ajahak atum ke sai jokje pen keklem nang ta do, bonta laso angbong saijokje atum abangta raikom atum pen sung nanglo. Raikom atum ta ili methang akeme aphansi keklem lapen ketheng-kechok pu keklem nang ta ajahak atum karju thekthe ajok klem nangkok lo. Laso angbong pen kechengsi ke tovar ebeng kesangnang mate kachingthanglok atum aphan ta kisung thektik lo. Lahai kachingthanglok atum ke aphi chedam nang ta thai ave aprang kevang ta kisung thetan. Laso angbong kamgchir-kalang it angbong pen raikom atum pen kisung kepho nang ta dopik lang. Lahai atum aphan ke dim-klong ta avur kevan atum pu kamatha ajok pek haihe. Lasonsi kecho ahormu ta pihai abang ave. Kipiji aning kehang atum inut bang hini do puseta kanghap ajir kiding ajok mo amethang dorde detji pu kachematha amat pi ingtungte det. Lasi lahai atum aphan ratpangri (Government) pen kachingthanglok atum aphan ke mathavek nangji. Non ke latum aphan lapu amat loplot abang ke chokche athe ha bang adet pen aningke kuti-kuti atangka padam pen vanlo. Tangte latum aphan kopisi aduk pado varet lo? Bang adet kachingthanglok atum ke kidukpik pu atum ke kalipin lo. Kiduk puke la det arlo amat kachongdat kachingthanglok atum henlo. Lasonsi India adet angbong ta Karbi atum pen danglok ke akaprek a state along kachingthang atum dopik lo, seta Karbi ariso-nimso atum aphan ke kachinidun atum aphan anke KAAC a CEM Tuliram Ronghang kerap dun abang ke mesen lo lapen choro nangji.

            Non kethenai ratpangri along rat kacheto nangji ke Lock Down along henlo. Laso a Lock Down ke Social Distancing mate kedo kachepahelo henlo. Bangso kapangdak ke ili methang akeme aphansi ratpangri ke keklem athe laso avur ke kachi un prap pik lapen akeso kapameji aphan ankreme (Medicine) avelang. Inutbak along jongsi nang kidun lo pulote halaso det amonit ke-ot along le ot dun pu anta kachi un lo. La an ning kiduk alam ning kachibi nangji ke mo pholok pulote ahem asor ta langdam longle lapen kithi arpum anta chelongle lo. Ajat adhorom punon bang ratpangri atumsi kithi arpum aphan ta meh plong det po. Meh keplong ahut kidun ke aphi alam lo, kaparju anta parjuje det tahai lo. Toh la ke kithitang pulo, seta mo kacholong lo pulote inutvet mate kibi padar po nurse pen doctor atum anvet lo kedamji. Laso aphi ke avur kachopholok atum akopai mesen pulote nangme po, bonta keso abang nangbat bom pulote lapu bikok po mo achethe ave lote var damphit pu anchot lo. La keso esek ta doctor atum ajakong kapado aphan saline pen vitamin pipo, seta kapame det aphan puke a ankreme (Medicine) ave lang ajok asatkalanglok pensi seh langbom po. Lasi laso avur pen kachereji aphan ardi envek nangji. Laso ardi kipi nangji ke bang ratpangri pen abidi lapen avarsai ta pilap lo than laplo. Laso angbong komatne-komatne atum kapachethang along kroidun thap nangne. Lasi amutpi ko an ma hong kebarbe lapen monit anglum along kedode detji, ri kacharsam mo eh ver nangji. Hem isi puseta kedo chinglumle det nangji. Lapu an kachere pensi jok unji.

Matric satlang angthek kaheno ili arpu che-en pame nang po

SEBA pen kapado 2018 Matric asatlang angthek 42.67% kelongdun pen Assam 27 districts angbong aber anatthu pen ingdeng kethom kelerok ke kopi lo ili kachethan jilang athe laso angdeng aphan ili o-thekthesi aningkanvang ta aber isi kalite non angdeng alongsi dover. Kedamtang penang aningkan ason thotsi pining lethot ta Assam angbong Karbi Anglong ke bangso asatlang along ki-un dun atum a phant kijumnei angbong isi lilo, achuning pen memuchot lo puvoiphit seta, Assam alongri eplang ta angthek la-an me-o puke kali det.

Karbi Anglong angkang kaike Matric satlang along kahenover ke kapaklong (Foundation) kememe apot lo. Athe aprang-prang thanbang anghoi kepek atum ke than thekthe pin atum ta do. Bangso along inutvet a thanbang kethan a school (Single school teacher) si ke-ong. Bangso angbong bang aphan (Adular) kapathan ta do, ason-ason asai (Duty) Census, Enumeration, NRC pen danglok kidun nang, mai-seke, saihem nang kehang, bainong kache endam, arni-arve pen kedamde, holiday, ok karengno, kaselet lapen amethang asai kedo ajok asai kachedamde heihui ke dopik lo. Tangte lahai a osomar kitap kelongle lapen hala school kidunde ta do lang, koson lo aklong (Foundation) ke keme thek po? Lasonsi osomar aphan pasang longle (PA-fail longle/ No detention policy) pu amat a oso le thekthe det seta angdeng abang parlubom. Bangso along ke-ongdung api-apo atum osomar kachelang dunde ta adai thepik lang. Laso kaparlu along ha ME pen high school angdeng anta lapusonsi dambom lo. Tangte kopusi kacharli ke kemesen po? Athe api-apo kachelang dunde chot ta kali ME pen high school along ke thanbang ta kadure thepik. Laso along ke thetan kasiksak dolo athe thanbang atum loh kethan patang un eh.

School do chit arni ratpangri school amokha along langdam sinang, L.P school pulote ingdeng pho do lapen subject pho anbak do. Arnisi angbong angdeng tin subject pho than nangji pulote ingdeng isi along period isi minute 45 nangkok. Son pulote arnisi period krepho than unvek nang po. Arnam kalite monit atum arnivang la-an keklem detji ajakong ave. Bangso aphuthak neli athak ketok athe amokha pen sai keklem arni kadure ke isi thetan athe lo. Jongsi thanver puseta kesang arni an ni pharo ra achitim anbak cheraidet lo. Bangso ajok thanbang inut a school along an kethan angdeng patang un-e. Lasonsi a-osomar atum ta thek pameme, arju thek pameme seta angdeng parlu bom nangkok. Lahai a-osomar atum angdeng kangtui ledun bom akitap nangsung bom po anke tong duntap po satlang angthek chepame dun thekthe lo. L.P school along thanbang dorplup pi un-e pulote matric asatlang angthek keme nangklangkle lo.

Non lahai pen kelang pangbar nang kedolang ke ratpangri a school pen private school. Private school along ke thanbang abainong ave pu ason lo jongsi ili ratpangri thanbang abainong pen le pangbar dam lote. Lasonsi hala kenangsot ahormu ta dopet ke kalisi ke-ong lapen thanbang atum ta mepik-pik ke kali, bonta HSLC satlang along ke private school asatlangsi memunakji lapen latum ajok pensi ingphun kachingthur un. Lasi lake kachepaduk lapen kinirsip pu abang kave det apot lo. Laso aphi ke school kethan abang ave tangho, thanbang vangve tangho lapen laheihui ason-ason kave ajok kesang, pulonang summer vacation ason-ason aphan bengpet ke class dover. Laso aphi tuition ta pipi. Lasi HSLC satlang pameji pulote neli athak kejong ason an pen chepajok thek nangji.   

Voreng pen medu aphan mathathe tik ke longri chingthur un eh

Isi alongri pachingthur oji pulote ratpangri aphan kachotonlok pen ke chingthur un eh. Amethang pen medu kachepavang aphan klemvek nangji athe ratpangri pen ke isi angdeng ansi nangrap unchotji. Laso along kethenai ke kachopanglim pu abang ave det nangji bonsetame non ladak ke Council kelong nangji atangka ke hala amethang ahem kachepangcho aphansi klem irong titi amat Council apuru abang ke ingcho un eh. Karbi Anglong aphan kemesen medu kevang atovar ke Forest henlo. Bangso aphi land revenue, industry heihui ta medu kapavang atovar mepik. Non medu aphan Tourism ahin abang ke pachingthur pame ason te vangpikji athe ladak kelang-kijui adim langsun pen danglok Karbi Youth Festival heihui ta do. Non abang ke picnic adim ta medu vanglo seta Council along tangka nanglele lapen kapangthir lapen ka ora pu abang ta ardi pipe. Laso aphi ke gate, hithi, fisheries pen danglok ta Council pen ke endet po a medu abang ke pipe po chodet titi. La an pen kachopanglim kilitnai ke Forest henlo. Ladak henlo medu ke-ongnai lapen saikhi atum kechonai asaikam lo. Lasi Forest asaikhi atum aphan ke lang lote ahem-arit pen danglok ke kecho, kedo-kethak a ot mate living standard lapen living style langdam lote chini pamelo. Karbi Anglong arlo ke ingnam lapen longle athor anta lapusi pa ik lap lo. Bonta bang keklem atum ke plang ipiklo. Lasi Council a medu ningkan isi along pen non kelongbom Sika 26-27 Crores adim jongsi klem pame, kachopanglim avepin lapen mesen medu kevang adim pangthek pen klem te ningkan isi along pen Sika kuti pharo sose ta kevangji adim do seta non kedamtang apor ahut anke lapusi panahok etlo. Jong lonang, granite aphan ta arlong champlang pinchong det. Lasonsi penang adim dolo. Lasi pachingthurji pulote medu aphan ardi pivek nangji.

            Non Karbi Anglong arlo kethetan ke Diphu pen Donkamukam arlo ke kachingthur thek longlo, seta akaprek adim an ke kapaphipik adimsi ke-ong lang. Kachingthur ahin ke North Korea akachingthur pen chinglit kailo. Lasi athak lapu kapamat varet chot ke mo lahai apeh-ri rak lote lapen a cosmetic ik lote kopilo keklempo? La anchot ta kali ahem langmesen amat jo-padap kechoji aphan sangtet ave pulote kopi lo kemanjilang ke? Lasi kevangjilang arni aphan koson pensi ove kimi atum voreng avarsai kelongji ma aphan mathavek nangji, kalite ason-ason akisung nangdopikji. Ladak neli kipu ke voreng puke ratpangri chokamar aphan puchot kali, kereng iji aphansi kipudam. Ladak ke lasi voreng avarsai pulote kachoklem lapen kachongdatji athai thik nangji. Kali pulote monit atum lahai penchot ke reng un eh. Kecho puchot ta kali keso ki-un eh pen danglok ason-ason kenangsot dopik lang. La an pen kethenai apiso-aso kachelana lapen osomar akai aphan mesen kapacharli kipi henlo. Lasi infrastructure kachingthur ke nangvek po, seta bangso along longri pachingthur aphan medu kapavangji aphan ardi kipi lapen voreng avarsai aphan loan kipi pen beha ahin kapachingthur aphan klem vek nangpo. Lasonsi Council pen industry kapangni ahin ta klem nangpo. Laso pen ke ason-ason ladak local atum aphan technical ahin kapacharli ta thik vek nangpo. La ke ason-ason technical institute, vocational centre, university lapen mesen-mesen ahongklam (Scope) lang pangthek pen career counselling, motivational lapen orientation programme deng nangji. La ning cheparong aphan ardi kipichot ke chokche, athe lahai ke malomso aphan anvet.       

Social Media pen kachere aphan kaike ning do nangji

Non malom ke Social Media akai pinak amat ajat alam non, akeme-akaheno seta malomso pen chethangplup titi. Mesen lapen kachepachoi nangji alam pulote kachini nangji lapen kachere nangji puseta chethik mek longkroi po anke akeme anat ke mepik lo, seta akaheno pulote henopik athe ajat ta cheman thek, nongno pen danglok ke epran lapen soluk-sodak atemon anta cheman lo. Athe whatsapp, facebook, twitter pen danglok ke ason dopik lapen anuttin arideng alongsi non malom ke social media arisim otkrai lo. Non malom monit atum lapuson lo ajat ason puseta a photo en po che-share po ahok-ahokhe alam lapen ko-an angkur dolone ke langdamde. Lason keklem ke lapu an lo, komatne le adung along kachingkoi kithi po ingko rang seta seh kelang aphan men-men keponphitji kalisi a photo abang nepsi a byte pirong apakji. Laso aphi konatma internet kedo lahai arjan social media along keloji aphansi aning kar-kar po, bonta ha akeso mate kisung kepho atum aphan abang ke ardi pipe detji. Laso pen akaprek abang ke nongno kedo ke kachethang prap pikpik, jasemetpet pen arloso lapen okorjang atum aphan, halahai a photo keklang ke ahok kali-kalang ke langdamde lapen munthi damde. Non malom ke mobile phone along amatsi photo editor ta do-et. Lahai along avi kave lapen aning kaheno atum ke kelang un eh arloso a photo along selamthap po an pen ke social media along post po tokdunthap tokdun pru titi. Laso along hala monit atum ta jasemet ke facebook along ke akaheno a comment un an tokdun po, seta hala arloso abang ke adai ave pin pen anong uno po, akai aphan anta akaheno do tahai lo pu abang ke matha rintite. Lahai along account ke-hack puta dodo. Ajahak abang ke a photo kachenep le ahok seta akaheno anat kepon dun pen ketokdunthap, lahai ke kamunthi dam akenangsot. Laso pen aphi ke isi ning kasiksak dun meme ke amo kevangve, jasemet pen whatsapp a group along ke-post thap lapen athak cholang pameme po isi ahormu ta anuttin ta post varet titi mate bang ke-post tang apot ta post dun lethot titi. Lason pen ning siksak meme dopik. Laso aphi abang ke amo kevangve lapen akaheno ason ke-post thap ta dopik. Lasi lahai along ke-post lapen ke-share atum hala abirta abang ko an ardi do, labangsi lang nangji. Athe anuttin ta citizen journalist lo tema seta hala professional journalist atum ason katarlip ko an ahok ma kali ma klang ma pu abang do nangji. Athe charvo meme, bang aman kejor pen danglok ke akaheno dopik apotsi kechengsi ke whatsapp ason-son lapen facebook ason-ason aphan ke men-men kroi nangne. Kroiri lapu ta kali seta kamunthi lapen kapatini pu abang akenangsot lapen ajahak ke kidip ta akenangsot. Lasi iri alongsi rat anglum keponji ajakong dolo voiphit seta lam keklang (Source) along kapatini, me-heno lapen mesenji-henodakji pu kamunthi lapen kachere nangji abang ke thepik an. Lasi social media ke akeme ta do akaheno ta do apotsi men-men share phit nangne lapen akaheno a comment pi dun tong nangne.        

KAAC Electoral aphuthak high court verdict along kamatha nangji do

Aru niphai 18 arni hamphang asong 24 atum lapen Sixth Schedule Implementation Committee atum pen KAAC kilik ke ST(H) atum detsi vote jok long chot nangji pu sixth schedule paragraph 2 clause 7 ateng Gauhati High Court along PIL kipidam aphuthak verdict kipi ke mesen long lo lapen ili Karbi akhei aphan ke akeme lo. Bangso alamrai (Verdict) kipi ke ili kachehok-ning arong nangji do lapen JI Kathar pen Ratan Terang atum akeja aphan chorore un eh. Bonta ladak ajahak along ning kibiri dam ason ta do, jongsi ilitum ajabang atum le aning aklong lapen khei aphan pu mathathipthe pulote. Athe rui ni angbong KAAC aphan komentu angbongsi lahai keklem unji ma aphuthak alamthe alamchak (Affidavit) high court aphan pachipi toi lo. Judge atum lamrai (Verdict) ketok ke “Learned Standing Counsel, representing respondent nos 4 to 6 (CEM-KAAC, PS-KAAC lapen Jt. Secretary Legislative-KAAC) prays for two weeks time to inform this Court by what time the KAAC will frame Rules under clause 2(7) of the 6^th Schedule of the Constitution of India.” Non lasi latum lahai a Rules kaselamji aphan ko an apor nangji lapen komentusi Court along kapaklang unji a lamthe kachipi mate lamthak kachipiji ke lamthe chipi nang po. Non laso apor ateng hala Council kangni cheng ahut tangka kave asai pu amat ST kali amonit Janardhan Pathak aphan arpu kepek ason abang rui thuthe det nang po athe ilitum ta thekser-ser atum dolo. Lahai along ke meme hamphang asong atum Sixth Schedule Implementation Committee, 24+ asong atum pen danglok ke ardi en pon nangji, seta ratchari asong aphan ke ardi pi varet nangne athe latum ke kaike ta inghoi lapen votes aphan matha pensi klemji apot hamphang asong atum aphansi ardi en nangji lapen laso aphuthak ardi dojot lapen apor en pame pen jabang atum pen kachingvai padodet aphisi rip nangji.

Mo lahai aron (Rules) tokdet mate selam det aphi aron ateng ke Governor a approval nangji. Non lata aron selam det aphi state government vur ponsi kapadeng (Approval) aphan Governor arideng paleji. Lason pulote Governor ke state ratpangri kipu atengsi klemji lapen state along kivur ahut ajahak alamthe (Word) lapen a sentence amokha lardet tahai. Lason pulote ili kaselamvek aron aphan palamtam po asai nang paklem nodak po. Lasi laso pen kosonsi karkan unji, puthot Court adonkam along kapangno pen ma mate kopi abidi ma kamatha parsik nangji athe ladak isi ning kachibi nangji ke national ratchari asong ke kaike ta majok non seta high command alamsi anghoi ajok pen kroi nangkok liji mate kroi liji lapen latum alamsi enji. Ladak kamathadam parsik nangji alam do. Laso angbong komatne supreme court damdet tahai lapen nangpasiksak tahai. Laso pulote apor nangchet lipo. Non laso keklem angbong akaprek atovar ke MoS pen kelong Territorial Council ajakong pen ili Governor aphan lophit me (Direct) ta pharai dam pen klem det un pulote ili kaselam aron (Rules) ateng Governor pen ning chethe dam un, seta BJP a ratpangri lapen Governor seta BJP amonit pinak, angbong amonit puke achoisi kapachingchoi lok chot apot matha dam nangji athe BJP ke Bangladeshi aphan aning ke dhorom alam pen dak nang kethokrutji pu along ta matha dam nangji. Lasi ajat noi seta non ke ephan akeme anat lo apot bangso amo kecheng atum aphan choro pen kacherap dun, kenangsot pulote angton arat thurpak pen cherap dun nang po.    

Khei aphan kamatha pameme lapen kethekthe atum kachari ajoksi ST ajakong kachingbo nang

Pirthe adang nahok seta jabang jongsi mesen kali pulote chingthur un eh. Athe khei lapen det, longri lapen havar kapachingthur lapen kapachingri ke jabang jongsi kevangji arni heloving-heloving kachechar abang kali pulote aphi kevangji akai aphan klem thekthe lo. Lason jongsi kamatha thek abang pulote kacharli kedo lapen kethekser abangphu nangji. Lake dak ilitum district nang kevanpi abangphu Semson Sing Ingti aphan langdam lonang lapen tribal aphan kerai mate tribal apo pule pu seta henone abangphu Dr. B.R Ambedkar aphan langdam lonang. Lahai atum kacharli kedo-o chot kali kethekser atum apot lo. Latum kevangji koson keklemsi akeme pu kachini pen keklem ajoksi ephan ekerai amo klem thek lo. Laso along kethetan abang ke halaso ahut ke ratchari pathepik kali lapen kahili dun lapen kekhamkhe dun atum ta kave det ajok klem mesen lo. Seta district kelong pen alangliphan kapachari longle lapen kacharli kave lapen kamatha thekthe atum Council kachari ajoksi ha kecheng ahut pen amatsi Karbi atum kevangji akai aphan pasiksak tekang pangcheng lo. Pulonang, kecheng ahut pen amat tribal kali amonit aphan Council along kethetan arpu Chairman anghoi kepek pen constitution kapaselam toi hen lo. Halaso ahut ta men-men kelonglok ajakong lapen ale aphan kapathe lapen ratchari kapathe ajok lapu heihui along ke ardi en thekthe det lo lapen kevangji arni aphan checharche det lo. Lasonsi chardunron pen vangbom lo, seta 1989 pen 2000 aningkan angbong ke jabang atum kethek atum dolo lapen aprang aphan masapso chechar lo seta ratchari kapathe ajok lata lapusonsi Claus 8 pen danglok ke akisung nang dolo. Bonta laso pen aphi abang ke ratchari ajok jakong pathe pen angsong pen ketoi alongsi klem lo. Lapuson ratchari kapathe ajok Semson Sing Ingti aphan pachari longle det lo lapen vangchot-vangchot pen pini sixth schedule ajakong ta chepangbo pame lo. Athe ili longle pen danglok ke vote kejok ajakong anta pidet lo. La an pen ning kiduk ke la hen lo. Laso along non akimi alam abang ke Council ajakong chokamar anghoi ta SIU pen PIU alam pathe pen pachepon lap lo. Lapu an jakong chipi lap lapen chari thekthe lo inut college a principal aphan anta ajat chovi thethesi bang richo ason pacheman long lo. Lahai ke therak meme lo. Non abang ke Karbi atum jakong chot kali lam-ki anta ingbo po seta laso kacheraiji aphan ajat ason ta cheklem thekthe. Keklem thek ante hala bang kemesen keklem atum aphan kekhamkhe pen kapasiksak dun hen lo athe aning arlo ke nephan nangrire det pu hen lo. Laso pen ke kilik ahut bangphu kangvai. Laso pen aphi ke rat kechokche ta vote kejok ahut song kapathe lapen amethang aphan kachematha kethe ajok mesen ajabang longle det lo. Lasi ahintin ta jabang atum kamatha kethekthe lapen kacharli kedo atum kali det apot lo amat khei aphan kevangji arni aphan matha dam thekthe det lo. Lahai atum malomso ale aphansi kapathe rinti apot lo. Lahai alam bang army asaiphu atum anta nangjinso set lo. Latum kaningje ke “Karbi Anglong is a lost district” pu pen danglok ke “Jabang atum mesen kali, amethang aphan kachematha chot atum lapen kamathe mesen atum kali” pu heihui dopik lo. Laso pen aphi ke bang angtan pen kevang missionary ajabang atum pulo “Karbi atum ke ratchari asongja dopik, seta kemesen rat saiklembang ave” pu. Lasi rat jongsi amek prangpre lapen non kejabom ratchari ajabang lapen ajahak ahamphang ajabang atum ateng kroi dunbom jilang pulote kisung ke damde.