Meghalaya Kilik along kachesong nangji thepik

Non nang keleji Thangthang 27 arni Meghalaya kilik ahut Karbi atum kachere lapen kachesong nangji thepik khangjang lo athe ili Karbi atum ahoi alam kaike kehangjo do seta methang amatsi longle kachepek pu abang ke chechinine. Non lason Meghalaya anatthu pen non Makoilum, Khanduli heihui malom ke km kep ta sose ke Karbi Anglong alongle nang parlo lo. Lason kaparlo chot-chot pen kachelang dun vangve ajok Assam a BOP (Border Out Post) anta Meghalaya arlosi dokok lo. Lapuson ahoi ke Meghalaya kedai punon Nagaland kedai punoi seta lapu ili a ratpangri (Government) ke BOP atum aphan ta langle lapen kenangsot meh, lang heihui anta tora pikpik, anta hala bang anat ke kachelang-o ajok lapu ili kachibi a BOP asaikhi atum ta halapu meh, lang heihui aphan kachiki dam nangkok ajok lang dun ding titi ta dopik. Ha bang anat ke ason-ason pen nang kebai-nangkepa titi ajok bidi kanglim along ke ludun det titi. Lahai ahoi alam ke arnisi vet lapen thang alam ave pin pen ke lam kalang un eh. Bang anat pen kachingthur amo tovar, meh, lang, seh kachelang, loh kacharli heihui pen danglok ke voreng kelongji avarsai contract heihui pi seta lapu ili natthu ke lason pen kaparlin (Opposite). Kereng aphan ke varsai nang kok, chojor cholang adim nangkok, chehelat nangkok, keso chelang nangkok lapen lang ta jun nangkok. Tangte lahai kenangsot ason aphan ahoi kedo atum kopi lo keklem po? Ladak ili kamatha dam nangji thepik. Non Meghalaya ke Thangthang 27 arni Kilik do po. Laso a Kilik aphan Meghalaya asor kilik nang kapachethang pu Karbi Anglong arlo anta nanglutsi vote nang chorek lo. Meghalaya asor ke tangka kedokok ajok tangka nangvar pikpik. Tangka pu ajok Karbi atum pen danglok ke kache en dun chejeng-chejeng lo. Bonta Nepali heihui atum abang ke angthin chepathe-o abang ave seta Karbi atum aphan kethek dun long pen kidun atum dokok lo. Lahai along Khasi/Pnar atum abang ke chethan jok plot lo. Kilik esek kedam-kevang lapen vote kejok damji anta bangsi pi lap titi. Candidates atum ke ningkan isi aprang pensi kevang rinti. Halso ahut pensi komatne sika isi hini puseta akenangsot along anke cherap dunlap. La ajahak jabang (Leader) pu atum aphan abang thuke tangka kapapeng atum ta dolo. Laso along kachehelat aphan gari kipi ta dolo. Lahai Meghalaya asor kopi apotsi lapu lapu an kevang varet lo? Karbi atum amen voter list along kedokok apot kali ma? Kopi apotsi amen kedokok lo? Lahai along kelangdam kaparsik nangji thepik. Lasonsi kelang-kamatha lapen kamunthi chot kali, kachere lapen vote kejok dun pen kekhang nangji ta thepik an. Athe kaike apor ke ili ahoi nang kepet, chesong nang po pusi ningje rinti, bonta thurpak abang ave. Katharle amo ta dengji pulo, seta ahokpet ratchari ajakong along ili methang le Meghalaya along kachethon dam kali ma? Vote kejok dun pulote kopi lo kacheklang ke? Voter list along amen kedo atum an ke Meghalaya asor pu kali lo ma? Amen kibi ladak adim amen ke bilorle lo tahai, lake bidi kanglim lo. Methang amat ta kachekroi dun ajoksi vote kejok dun kali lo ma? Lasi kenangsotnai apor ahut ke ili methangsi Meghalaya arlo lo lapen netum ta Meghalaya asor lo pu kachipu ajoksi vote kejok dun lo. Laso ajoksi bang ke ason-ason akerap kevan lo. Saihem aron (Officially) ke Meghalaya pu lo lapen ili ta kekroi lo. Mo court along le chedan seta laso alam ke vang vek po. Lasi ladak kamatha dam parsik vek nangji lapen ratchari asongjapo atum ratchari ale aphan kekhanji kali vote kapajokji aphan varsai kipi pen kithur dunplut heihui ke lang matha vek nangji.     

KCS ta kachethirik nangji apor lo

Karbi Cultural Society mate KCS aphan mute kona-mana lapen Karbi arat ta Karbi Youth Festival pusi kachini. 1974 aningkan pen ke:ongdung atum kache:o un pen kachepaduk ajok pini lapu an angdeng nangle lo, lake ha phi-phu akai pen angthun ajutang lo lapen lake ning arong aje (Festival) pu cheman long lo. Bangso ajok Karbi atum nevi alongsi dolo pu anta kachematha atum dolo. Lapuson kacheman long ke kedamtang keja atum kemesen ajok lo, seta pining abang ke methang ajutang bang aphan kejor asonsi cheman lo athe Karbi aron ateng pen ke narikoi ke ingthu paphukphe. Ahok jongsi klemji pulote Karbi aron ateng ke horbong arnam puchot, asangtar kelang ke narikoi phuk-phukphe lapen acho kelang alar ke horbong alang kilisi lang po, lata chini rinti lo. Laso pen abang ke mai pen kedeng alun kilun ahut aning along ari kachibi ke konat a Karbi a ot lo? Lasi la hini a ot ke Karbi ajutang aphan bang ajutang along kachipi-kachehodai dam lo. La an chot ta kali, ratchari lapu an lo kapathe jutangpi keklem along anta ratchari angthek kachibi bang Hindutva a agenda pu along abe kivung alongsi chingdoi dun lo. Laso pen abang ke ratchari atumsi kapaklong pu abang ke gate heihui along anta ratchari ataipo atum a photo lapen alohi along kepha ta ratchari ataipo atum aphansi pathe lo. Lahai along alohi sarpo aman ke det lapen angtan along anong kachethang komatne jutang klembang (Culture activist) kalite thetan anong eh (Award) kelong ratsaiklembang (Philanthropist) kalite kangthur atum (Promoter) aphansi hang nangji. Non abang ke arong-aje chengche aprang pen rikong vetvot ta chi-i longle puta isi jutang kabirti kali jutangsi kapavir asaisi klem rong lo. Kopi apot lo? Langnodak apot pulo ma? Seta hala bang akaprek angtan chot kali, India adang along idunghet Naga, Arunachalis atum pen danglok atum aphan langdam tha. Jongsi lapuson langnodak pulote arloso atum jiso kacheper ta ington tha, mate lake arloso atum aphan apot ma? Mate rikong vetvot ke jutang kali lapen jiso kacheper ke jutang pulo ma? KCS ajabang atum lahai keklem thap lapen kechokche kethetan ajoksi kangpu amai ahut flag parlin phak ke nang kethan lo athe lapu an aningkan, ningkan 43 lit et ta lason ke cheplangple pin lang. Laso pen nang kapaklang lo jabang atum amethang arpu kacheklem kapangkre, kapasa-oi lapen kechokche lo puke. Ahok lo chekrongkre puseta cheklangdak lo. Lapuson jongsi dam lo pulote rat kacheto abang kasiksak doji. Non lapu an akichun long ke rat kacheto apot lo. Jabang atum ke ale ta long-i pikpik lo, man-peng pen danglok khi-dat ingcho lo lapen reng ilo lapen plang ilo. Bonta pini arni lahai kapachun ke zone atum kachepaduk apot lo. Seta latum aphan ardi kipipe pen aduk kedo ke chethan jokplot lo. Pining ta langdam lote long po. Kedo-kethak lapen kecho-kijun. La an chot ta kali aningkan-ningkan lahai atum kedam-kevang chot kali kecho anta amethangsi kachiri nang. Ha Chinthong ason-son a zone atum ke kirung athai anta ave, seta jutang kachinghon pen chepaduk-che:osi klem rinti bom lo. Lasi non pining an ke keklem kechokche lit pik, ratchari kapathe ajok moning pen ke KYF ta 2000 aningkan asonsi phurkimo ke chirui thu tahai lipo athe zone ke ASDC atum aridengsi ke:ong lang. Lahai atum ke amethang aphan ale ave pin pen kachepaduk ke kachesong pen keklem atum saide lang. Lasi matha parsikse lepute non kachari atum KCS lapen KYF ke pachilut pachiphutji angdeng nang kele lilo.

Corruption aphuthak chini pameme pen bang aphan kejong dun

Karbi Anglong arlo corruption thepik pu abang majok ta chini lapen ningje hur lo. Athe bangso aphuthak penang an ke print lapen electronic media along ta klang lo. Lasonsi penang an asong atum khamkhe lapen kachesong amo ta deng lo lapen case ta police station, CID lapen high court along ta pi dam lo. Voiphit seta nonpu anta corruption keklem abangphu inutbak kachingnang puke thek longle lang lapen arju longle lang. Tangte lapu an asong atum RTI kejok pen kejongdun pen kopene ale dolo ma? Mate corruption tong kave det amat kejongdun thap ma? Lahai langdam et pulote angton pen methang amonit lapen emethang along amat corruption along kacherap dunplang ajoksi nep un eh. Lahai along ke ili anuttin amat ta elong ma elong ke kacherap dun dovek lo. Neli puji, kechengsi ke ke-ongdung arat, latum pupo netum ke corruption klemkle pulo. Seta langdam senang, corruption keklem atum along donation kirung dam, tangka kachohangdam lapen methang amonit pu amat kedo dunjoi. Lahai amat rat pen amat ta doklip lo. Lasonsi song atum ta RTI jok po amat tangka pen palar det titi amat ingsamri, hala tangka kelongle lapen aning kangsamse adim pulote sarlang dun po. Tangte lake corruption kali lang ma? Lasonsi chokamar atum ta abainong pen akaprek atangka kachohangdun, tender along klem thap pen amethang amat sai klem det kalite apharman kache endun. Bangso ajok contract, supply lapen chokamar anghoi punon tangka ajok pen kelong nangji vek atum longle lapen hala tangka kedo atumsi lahai government ason ta longle long. Laso pen aphi ajahak aso-asa government pen keron ahormu, pulonang IAY ahemso heihui an-nat ta local leader atum panglim det. Lahai along local political leaders atum chodet. Latum aphan ta rong arat atum amethang rong isi pu amat langprong, kalite tangka cho en dun chom po kalite ason-ason alam pen dodunklip. Lasi lahai ke government saiphu-saikhi atum det kalilo, local leaders, rong asarthe lapen arat atum anta adai dolo. Lasi aron ateng langdam lo pulote kachoklemvek along kacherap dun, abe kidun, kidip dun lapen chini det pen ta do dunjoi heihui ke corruption keklem along kacherap dun lo lapen keklem lo. Lasi kaike amat ratchari asongja, pulonang CEM, EM, MAC, MLA, MP heihui lapen saikam asaiphu pen saikhi atum aphan koi varet ke ale ave lo. Corruption keklem kechengsi ke lahai ratchari asongja atum lo, laso aphi ke song asongja, saikam atum lapen rat atum amat ta lo. Lahai kado kave along kidunkri ke media atum ta kacherap dun lo. Lasi neli kipudam kangtung abang ke angton pen amatsi cherap plang lo. Lasi lahai along kacherap dun kave pin aphai kave kali do, seta ingthirjir puke jumpik an. Lasi bang aphan kejong lapen kachepangthirji aphan ke emena aphan loji chelang pen detsi jongdun pen klem pangcheng nangji. Lahai kejong atum lapen ase kachibi pen kasarlang atum anta amena-mena amohor loji along chelang pame pensi klembom chesong bom nangji. Lasonsi amena ale aphan mathathe ra ahok-ahak klemji pulote klem pame nangji lapen hala kangthirjir asong atum ta do, halatum aphan ta aman pi pon thek nangji. Lasi kechengsi la kasarlang atum aphan rat pen kelangdun pangthek nangji ke thang abeha-bepar ave pin pen akhi-adat kangcho lapen kedo-kethak a ot pen pangthek noi. Lalote chini pen pangthek un po.

Kangkir ajutang che-o eh te kachingthur tikuk po

Karbi Anglong angkang kangkir aphuthak ke amen chethangklong. Seta laso kachethang ke langdam pame pulote therak meme ta do athe non kedamtang apor ahut anta kangkir pen ko an ale do ke thek long pame lo. Bangso amo pen ke akeme alam kali lapen alam athepi ke kangkir pen ke paprang dun thekthe pu abang ili thek long pame. Kangkir kepha atum pupo kachesong lapen kekhamkhe kachepaklang pulo, seta komat aphan lo kapaklangji? Kapaklangji kali bang nang ingnek choi rongsi non an ke nang man bom lo. Kangkir kipi pen ke abirta (Message) kapaleji pu abang ke chunche athe pini arni anta Dispur pen Delhi ke heloving lo dak Karbi Anglong arat pu kali Diphu ketotprong atum anta kopi apotsi kangkir kipi ma pu kachinine atumsi ke-ong. Lasi neli kipu dam kangtung abang ke methang amonit atum amat jongsi chinine lepute komat lo kachini po lapen ko ansi ardi kedo po? Toh malomso apor aphan kangkir kipi pen angtong paleji pulo, seta keklemvek atum kangkir pu abang ke pachethangdet amat kangkir kapachunji pu amonit (Picketers) jongsi ave lapen ingsamri pen bang kulat ta kangpu atum ke ingpu lo lapen gari kevek atum ta vek lo seta mane inut bak ta chupu dun dop abang ave. Tangte kangkir pen kopu abirta lo kele un po? Birta keleji ke amonit mate arat ave, latum ajakong ave pu matha rong po anke ardi abang ke ave lo. Ardi kedoji abang ke kisung kachechaknang ardi abangsi kedoji. Latum kachethanji ke bang komatne atum kangkir kipi do tangho, hajira ta dun athai ave lo, chonam athai ta ave lo, chojor athai ta ave lo, kedam-kevang kasiksak pen keso kachepon, satlang kipidun lapen ason-ason kisikvot lapen kachingkhan asai anta klem longle lo. Lahai pen ajok sung po lapen nahok po. La henlo rat ale kelongji ke. Lasonsi komatne avi kave lapen aning kaheno atum abang ke ale cho en dun po, la henlo rat ke ale kelongji ke. Laso pen kidunkri risim ke-ot atum ta amen chibi pen un an ther po seta hala bang kona aso atum kulat kangpu pen gari kacheleng heihui ke thang chupu dun dop haihe. Ki un ke ha rong arlo majok thekdunde pin adim lapen kangduk chohai un chit atum aphan anchot. Latum ta kethek ke kether pen anpara ajat ta ave. Karbi atum asarlamthe “Kangder asining arve jangje” pu ason ben lo. Lasi lason rat aphan kapasiksak chot abang ke majok asong seta keklem ington nang po, kali pulote rat akisung pen kachingthur abang ke tikuk det po lapen jongsi klem vekji pulote patihur thek nangji. Lason patihurji pulote Karbi Anglong hini a district adangpi arlo rat nangbarpak nangji lapen tovar bethe-betha arjapthip un nangji, jasemet pet ke national highway pen rail. Lasonsi risim ke-ot atum ta kether lapen amethang ale aphan chot pen rat pen tangka kehangthap pen kapasiksak ington non lapen kachingkrin abang ta ington ra asai abang le paklang noi. Kali pulote latum ta risim che-o noi. Lasi majok noi rat aphan rap thekthe pulote kapasiksak pen kapasung abang ington vek nang po. Kachesongvekji pulote rat thurpak lapen chetopak pen chesong lote rat ase ke government ano along levek po. Ajat atovar lapen abidi pen le chesong non rat nang sung dunde det nangji lapen nang sung dun nang puseta angthek lapen ale abang klang nangji lapen ale do nangji, Lasi chesong nangji seta atovar abang chelang nangji. 

Government saikhi atum Syndicate si kapinchong

Government pen rat aphan lapen rat akhi kapalangji aphan government amethang amonit chibi lo. Latumsi monit kerai, medu kirung lapen akhi anta rai lo. Laso aphi ke chari-chalon, pulonang pangri-pangsam anta arpu dolo. Lahai government asai do an kapalangji aphan kachetoi amonit atum amethang asai cheklemklesi meng le menthu kehon asonsi cheman rinti lo. Lason kacheplang ke jasemet pet pen Karbi Anglong alongsi kilitpar. Laso kacheplang pu angthek ke ahem-arit, akhi-adat lapen kecho-kedo a-ot pen hen lo kethek long. Lapuson kecho amek kethe ajok government pen kapalang atum ke gate punon ajat punon seta local gunda atum hapta atangka kirung asonsi Syndicate pinchong lap lo. Lapusonsi asi-asi asaikam; sales tax, income tax lapen mahals, gate, jangthu, parking tax, ghat, ason-ason a royalty heihui kirung aron aphan paronre pinchongsi amethang apha kachirung pu ateng lo. Athe kelong ateng government along thapthe (Deposit). Laso pen kelangdam nangji abang ke lason a gate heihui kibi pen rat aphan ale kalisi rat aphan panahok rong. Lasonsi thengpi kerai atum thengpi kanghu ajok rai lo puke pubom seta a ingnam abang ke ruphup lo. Rampi adim ramso lapen thengpi kethe kedo nangji adim ke thengpiso ansi dochot lo. Lapuson corruption keklem ajok langroi, pulonang Chomna alangroi along machine pen paronre pen kiphur ajok mesen asangti ke ik bom lo. Phurphe puke pubom seta Forest atum keraiji atumsi kacherapdun ajok Nagoan asangti pu pinchong amat arnivang ta hum pharo lekai asangti ha Manipu anta pon bom, anta rat lapen hamphang asong atum ta langdun prong apak. Lahai ke corruption keklem ha rong arat pen ha CEM an apot lo. Athe nepji puseta komat aphan lo kenep po? Lahai along ke angton pen amatsi kacherap-plang pinak. Lasi langdam pulote government aphan ta medu pipe lapen ason ta nahok bin ke Karbi Anglong arlo corruption kethe ajok asaikam tin along ta Forest asaikam pen chenglok ke lit parpik lo. Kechengsi ke langdam lonang Forest asaikam, laso asaikam along Forest Gate ta do, seta lahai a gate along long ko an adimsi arnivang aronre pen kepon Forest ahormu an kekhang et kedo lo? Seta alongtin a ingnam, reserve forest heihui anta ave bom lo. Sonsi arlong ta a inglong-inglong pen amatsi run bom lo, sangti ta ave bom lo, koila ta ik bom lo lapen sigun athengpi ke athengpi amatsi ave det lo. Nep lo lapen asai cheklem pame lo pusi saikhi atum chipulo, tangte kosonsi lahai a ingnam lapen sigun athengpi heihui ki-iklap lo? Laso along kelang pangbar nangji ke kenep pen kekon chingbar ma? Lahai Forest asaikhi atum ahem-arit lapen akhi ta abainong pen pangbar noi. Lasonsi hala kecho-kedo-kedam a ot (Living standard) ta kelong atangka pen chingbar ma? Lata lang noi. Lasonsi ha Transport asaikam atum ta aron-et pen truck karthang nangji ardi pen danglok aningkan-ningkan ta bhara a gari an, bus, truck heihui ke a document avepin ta lapusi dam bom lo. Laso pen aphi ke driving liscene, registration, permit heihui ahut tangka pi nang-o. Lasonsi hala sales tax pen income tax atum ta klem lo. Laso aphi ke central excise, lapen asaikam tin lapen asaihem pen ta medu atangka kipi nangji ateng a revenue pipe. Lasi neli kejongdam kangtung ke lahai atum ahok-ahaksi amethang arpu kacheklem ma mate tangka kapavangji aphansi amo kevangve a gate heihui kasemar chot ma? Lahai a gate lapen a checking ke Forest punon, police punon, MVI, Agriculture pu non mate ajat asaikam punon seta Karbi Anglong arlo ke isnat lo. Lahai ke tangka kapalongji aphan isi a Syndicate chot. Lasi bangso along rat cherok lo pulote KAAC a revenue ingtang po lapen ke rat apharman kachingthur amo klem long po.        

Karbi Anglong aratchari kadikdak

Karbi Anglong aratchari ke hako pen ta komat ma Dispur kangni halaso asong alongsi kachepa ok dun-dun. Bangso ajok political instability kedo ta ili penang an ke thek long-long. Lason kejongdam meme ke 1978 pen 1989 ningkan angbong la ningkan kep angbong bang nerkep Karbi Anglong District Council (KADC) a CEM nang chelar lo lapen nang cheman lo. Karbi Anglong aratchari ke lapu ansi amethang aphan chot pu cheklang lo. Lasonsi non lethot ta kangtangkring KAAC kachari Congress a government ta bang kethom a EM, Birensing Ingti pen Khorsing Ingti amonit pen akaprek anke BJP dun lap lo. Kache Rongpipi abang Birensing amonit seta Longki Phangcho penta isi vet kachepho ajok BJP anat kilir munak thek longsi dunjui lo. Laso along ili kelangdam nangji abang ke Karbi Anglong aratchari atum ke amethang aphan chelang-o lapen rat aphan lapen a principle pu abang ke pathethe pu cheklang pame lo. Athe non ili kethek longprong ke corruption lapu an akethe ajok amethang kachetebinji pu alam dunruk lo. Seta hala HSDP bang pho atum abang ke kamatha mesen lo athe latum abang ke ha 2000 pen opposition lok lapen la bang pho ta non an thetan corruption abang ave lang seta non kangni bom a CEM abang ke ha ASDC ahut ta ASDC lo lapen laso aphi ke CPI(ML), Congress lapen non BJP. Alangli keja ke hako pen ta komat ma jakong kedo, halaso asong alongsi kachepa okdun-dun. Laso pen akaprek UPDS along ta lapuson lang. Lasi non akimi BJP asong aphan koson pensi kachelar lapen akeme pu ning kachethe un po? KAAC Congress kachari ningkan krepho a anti incumbency lapen corruption ta lapu amatsi angtong abang Congress aphu athak pen BJP aphu athak bat damkok amat Congress ke fresh pu asonsi nangdo lo lapen BJP abang kedamgtang ningkan krepho anti incumbency pen corruption anghor ke inghor nang po. Lasi BJP ta akeme chepaklangji pulote akaprek matha nangkok po.

Non ili kamunthi dam nangji abang ke BJP ta arlo-arlo ke akaprek a politics aphan matha vekji athe Tuliram Ronghang aphan lapu an akekoi (Allegations) pen ke BJP a image aphan matha vekji athe Congress pen ta minus Tuliram Ronghang and Mongolsing Timung puke kekroikre det ajoksi van nang et tahai, seta non HSDC a team BJP kidun pen ke akaprek matha po athe non Jagatsing Ingti akeja pen kachepa-ok dun ke clean pusi matha po. Athe Jagat Ingti batai kethom MLA keman ahut ta thetan corruption pu anong ave lapen kaike ta kedothjip lapen kachepaningding abangphu pusi kachethang. Lasi change of guard pu abang ke dovek po lapen Tuliram Ronghang lapen abutung si non ateng KAAC kedo thipji puke un eh. Bangso along isi kethetan kelangdam nangji ke KAAC a team BJP kidun ahut komat a high ranking government amonit lapen song amonitsi nang kidun lo? Song amonit pulo seta lata second grade asongja seta Jagat Ingti atum kachepa-ok dun ke cheprek chet lo. Lasonsi kevangjilang a politics ta cheprek po. Bangso kachelar along ajahak a EM pen MAC atum Congress chedam tahai seta Tuliram Ronghang ke chedamde lo athe alangli phuthak lapu an akoi kedo enquiry aphan chematha nangkokji lapen Hemanta Sarma pen le chemesen puseta alangli ta lapu an rai un eh detji. Lasi non kevangji ke Sum Ronghang pen Momin akerap pen Tuliram Ronghang ko an klem unji ke aporsi than po. 

KAAC along sorkar kachelar

Amahang kali, ang-om

Kedamtang ningkan krepho Congress si KAAC chari lo. Bangso angbong Congress asongja lapen atoi atum aronre asai keklem rat atangka kachopanglim ajok Karbi Anglong arat achethe vangseng lo. Lasi corruptin ave pin ingthirjir (Clean and corruption free) a sorkar sengsi “Arni keme – Achhe Din” rat aphan van pipo pu BJP asong kechak alam Karbi Anglong arat atum aning arlo lut chok lo. Bangso ajok Congress aphan koiphaksi MLA inghoi pli angbong pen inghoi kethom haidet lo. Non Killik kehai ning arong kachipi jutdet aphi rat atum aning arlo komentusi “Achha Din” nang kele po ma pu chonghongrong lo. Bonta BJP asong arlo songja angbong kamatha kachetonte alam rat angno nangklangbom. Bangso ajok song apharman kecheng pen keklem kachepadukvek atum song alamchak rat aphan pachun pi un eh bon pu aning kibi pen aning ke-oi atum aphai nangchan bom lo. Bangso alam kethek-kere (Intellectual) atum angbong ta kachethan arju long lo. Alanglitum ateng ke BJP asongja atum aronre asai keklem, rat atangka kachopanglim a Congress asongja atum aphan kedeng pon ke “Methang kangthoktang angthe kachejoi ason lo”. Athema Congress asongja atum aonre asai klempik, rat det, heme jangre, kiduk-kelak atum atangka chopanglimsi amethang akhi-adat chepangcho pu anong chethangplup aphi lapen angthek klangdak aphi ta song along kedeng pon ke BJP Election Manifesto ke seme langdang man det lo. Ingthirjir asorkarsi rat aphan charju pon po pu rat atum angno kachechak ke pachobai man det lo. Congress asongja atum kechokche aronre asai keklem aphuthak Killik ahut Congress I asongja atum aphan rat angno ington pen sorsi rat akerap long pen Killik chepahai lo. Alanglitum kangthok kahijimtang asongja atum aphan chiklo ejon aphi me-o pu hokthusi kedeng pon thu ke BJP asongja atum ta Congress asongja atum aphan memuchot ahok muchot pu kipudam sungkrung lo. Lahai corrupted Congress asongja atum aphan tuluhi alang arsi prui-pruisi BJP asong along deng pon pen achoi larchot ke Karbi Anglong aprang aphan memuchot po pu ning kachethedam adim doji ma? Karbi asarlamthe kipu asonsi “Amahang kali ang-om pu ason lo” Lasi lahai corrupted atum aphan song along kedeng pon ke BJP aphan mo aphi kaatora dovekji. Pima lahai asongja atum ke BJP aphan aning kedok, keme pu lethek kachinine pen le kidun kali. Bonta Dispur along BJP sorkar sengdet aphi alanglitum keklem kechokche apot areng keso pen kachgepajokji aphansi katherak amek bikok asai jokje pen BJP along kidun nang lo. Bangso alam ongdung arat atum chini lapen jasemet pen jasemet ke BJP atoi atum ta chini pame. Lasi BJP asongja atum bangso asai keklem ke “Political mistake” keklem lo pusi penang atum ningje hur. Athe lahai asongja atum BJP along chepa-ok dundet aphi ke a ot adur chelar po pu pu un eh, aprang asonsi doverji. Lasi KAAC along BJP seng lo, memu chot, chok muchot po puke kalidet binong po. Bangso apotsi BJP asong alamchak chepapleng un eh det po. Anke kedamtang ningkan krepho Congress asongja atum keklem kechokche adai ke BJP asong aphansi arvakhup po lapen rat atam chechak nangkok po. Bangso alam pen ajok mo aphi song angbong chihisaise detji puta puthip un eh. Song apharman keklem kachepaduk atum BJP Killik nanghai lote isi hini sorkar avarsai chelong dun po pu aning kachethe atum dopik, bonta non bang 14 Congress EM MAC atum BJP cheplangdun pen KAAC along jakong ot thip apot BJP puseta Congress pen kevangmi CRM, EM adon arap ajirpi-jirpo pen atoi atumsi avarsai anta cherailap po pu kaphere pen aning ke-oi atum ta dopik. Lasi KACC along BJP asorkar nang keman ke thangnat akimi angthek ave.