CEM arpu pache-o toi alam pen KAAC linglang cho ke hemprek ajakong kapabop asai

Non KAAC kacharibom a CEM Joyram Ingleng aphan arpu pen che-o nangji pura bang 19 Congress a EM pen MAC atum mang lo. Bangso aphuthak hur cho pen song along chingvai nangkok lo. Birta kelong ateng ke CEM aphan chari kipriji lapen state kehang ahut soluk-sodak atemon kevan pusi akoi kipi. Akoi kipi alam anta MP ahem lapen minister ahem along kachingvaidut ahut kachetokprok ke CEM si hai lo voiphit seta KADCC penta lamrai kedeng ajok anghoi pen pacheto-toi lo. Bangso aphuthak arnisi-nini angbong Joyram Ingleng CEM arpu pen che-o po pu pherangke amai along KADCC ameiphu Sum Ronghang pachetak voiphit ta bangso arni amat CEM Joyram Ingleng ta angkur kave alam karbokthap lapen kesoluk-kesodak aphuthak karbok lap ajok alanglita neliphan lahai nangkarbok thap alam an che enlap matik ke arpu pen che-o eh pukok ajok kalinglang cho abang ke dokok lo.

            Kachinidun ateng pulote non amat ke Joyram Ingleng abang arpu pen che-eh det seta alangliphan ajat ta klem no. Athe non amat House along No Confidence le vanji puseta 2/3 majority nangkokji. Bangso aphan ke aphai ave, lake mo Phaikuni achiklo Session aphan chonghonglok anchot lo. Halaso ahut abang ke simple majority pen seta No Confidence van un. Bonta bangso arni aphan ke non chiklo ejon sose chonghong nangjilang. La an apor angbong ke Ingleng aphan CEM aphan arpu pen che-o nang po pu along penang kachelarji angring do. Akaprek atovar abang ke song alam kapatepek pupen laso angbong jongsi song pen sorplot pulote lake ha 2000 aningkan CPI(ML) pen ASDC kachekak aphurkimosi ruithupo, anpen jakong abang ke Opposition atum along lerok po apot lason ke Congress high command atum ta klem haihe. Non kedokok isivet atovar ke bai pame pen kapache-o pen akaprek ke ajat ta klem no athe alangli jongsi aning thihak pulote bang pli nominated MAC aphan ke thanpet pen akaprek alangliphan kekroi amonit atum aphan bat thurong un. Lason pulote amohor amatsi chekarphakji. Lason apotsi kachehilisai abang ke men-men penle kijutkokji kali.

            Non laso along rat atum abang katikuk theduntan lo athe laso alam pen chiklo jon ko an lone ke kachingthur amo keklem along ke katikuk dovek po. Laso aphi non Bill kipiji apor ahut ta pi longledet po. Laso ajoine rat atum angbong aning ke-oi pen kehangjo dolo lapen lason jongsi dambom pulote Opposition atum aphan ale vang po. Athe majok seta lapu an apor kithi ahut CEM kachelar voi ke rat atum ke chedondunde.

            Non ili kamunthidam nangji abang ke lahai komat ajoinesi lapuson kacheplang long lo? Neli kipudamji abang ke lake state machineries atumsi hemprek aphan kapatikuk. Lahai ke hemprek ajakong kapabopji aphan lo. Seta dak ilitum asongja atum ke lahai matha damdesi bang state atum kapinkhat alingsi anghoi kachinghon ajoine abe dunrup lo. Seta non bangso along kamathadam pame nangji abang ke non lapuson hurisaibom pen hemprek aphuthak pangsamri pulote non aphong arat kithurpak along ke songja atum aphan kapano pen khang un eh lo. Lasi songja atum inghoi aphan kali rat lapen longri aphansi pathe nangji.