Rat thurpak kachesong along ratchari patip lote chun un eh

2003 Bodo Accord Claus 8 along ketok Karbi Anglong pen Dima Hasao kedo a Bodo atum aphan ke ST(Hills) parlo po pu union cabinet along kacheparai aphuthak rat thurpak pini Aru 30 arni kachesong ke rat aning kipung chepaklang angthek klang lo. Bangso kacheong along Karbi, Dimasa, Kuki, Rengma heihui akhei ahamphang asong chelangpet pen Hills Tribal League ahongklam pen chelang lo. Bangso along ke Karbi Lammet Amei pen Karbi Cultural Society atumsi bangso kachelang asong aphan ja lo. Latum ha 2003 pen amatsi kachesong cheng dun lo seta angbong kangsamri ajok kedamtang chiklo jong trok aprang malom pen kachesong pangcheng thu lo, seta non puthot ratchari atum ta arjap dunsi Hills Tribal Protection Forum (HTPF) pu Congress, HSDC lapen BJP atum chelang pen sengsi station malom kacheklang pangtang lo. Mesen lo seta laso along kelangdam kaparsik akenangsot lang athe Karbi Anglong a Bodo atum lapuson ajakong kelong ilokji kechengsi ke lam methang amonit atum kachekroi kedodun ajok. Laso aphi ke Tarun Gogoi ta kekroidun kipi (Approval) kipi lapen BJP atum abang ke asakhi ketheng atum lo. Lasi ladak ke kechengsi ke ratchari asong lapen asongja atum akachesong aphan ke ning the-o nangne, athe ratchari ke amethang atum amo le kepleng lote kangton lo. Lasi Congress atum ta non amat ke central lapen state along ta opposition kedokok ajok chesong lo seta hala Tarun Gogoi approval kipi ahut ke dak non karjap a Congress asongja atum ta doklip. Lasonsi ASDC atum ta klem lo lapen lasonthotsi BJP atum ta klem lo. Laso apotsi hamphang asong atum akachesong abangsi ardi pi nangji. Athe mo BJP atum ta minister long dun lo pulote lasonsi doklip li po lapen kevangsi MAC kilik kedokok ajok opposition Congress pen HSDC atum ta kilik nangnele tik ke klem po seta ahok-ahak mo kilik aphi kopi manji? Halaso aphansi mathadam nangji. Athe non BJP kedobom ahut Congress pen kehai atum puseta EM kar-i ajok haidet aphi ke BJP si state along kapaklong ajok BJP lutruk po. Laso aphan abang ke ratchari atum ke guarantee ave, seta hamphang asong atum abang ke amethang ale aphan le kachesongji kali. Kachesong abang men-men parjap-lun mate kapangtangkringji pu abang ke un eh seta kachesong achethe abang dingji. Seta ratchari atum ke song aphan lapen amena aphan le ale kijut lo pulote ke-o lo. Bangso alam ASDC amahang kethek pen ahok-ahak hemprek aphan chesong lapen isi angdeng anke chun lo, seta latum ta ratchari kisun pen ke bang jok ativisi cheman dun lo, hem totlun pensi hemprek hangbom lo. Lasi non Karbi Anglong arat atum ratchari asong akachesong aphan bikok nangne seta majok asong, Congress, BJP lapen HSDC aphan puseta ning the dun varet nangne athe lahai kopi lapen koson pensi nang kacheman ma ke ili kado kave ta thek prong lo lapen chini hur lo. Ahok ajat ason seta ratchari ave te un eh lapen chunche, seta ethe ning kachibi nangji abang ke kapabobji ta ratchari asong atumji. Lasi rat thurpak lapen rat ajakong aphansi ning chethe nangji. Athe mo kisung ta ratsi sungji, seta bang songja atum ke sung vangveji.