Diphu ahithi kangkir aphuthak administration along lam kejai dun ke mesen lo

Denarong alam aphuthak hamphang asong atum pen arni hothe pin pen Diphu ahithi kangkir alam pen hamphang asong atum aphan deputy commissioner Mukul Gogoi hangsi kangkir kache enji aphan choningri lo. Bangso alam aphuthak aphi-aprang chelang pen matha pame pen Kishore Choudhory pen Uttom Dey aphan nepne tik ke kangkir che en eh pu abang ke mesen lo athe kedamtang arni Jhankar Saikia alam, Abdul Khalekh alam, Bokajan malom alam, Chowkihola alam lapen Langhin malom pen alam ahut ta Kishore Choudhory ke kaike ta khei alam vanver lam cheklangdak pen lapuson alam jai ver. Lapusonsi kaike amat ta Block I pen II malom ke thek prong lo. Bangso aphuthak ke hamphang asong lapen rat atum arideng ta angthek mate video lapen voice recording do rep. Lasi lapuson kaike amat khei alam kevanver aphan ke pangthek pame ra aron ateng pen ingsai nangji kali pulote kedamtang apor ahut ason masapso bang jungjung hijan kachebohong lapen non ason adai kedo aphan ot seta khei alam kevan pen kapasoluk-sodak ke dover lo lapen dover po. Lahai alam ili kaike thek prongver lo lapen chingtang nang bom lo. Lasi bang hini atum aphan pangcheng pen lapuson khei alam kevanver atum aphan anke non ason ahut ke ot thip nangji lapen ingsai nangji. Athe pini arni anta Karbi atum ke kacho-artuk lapen khei alam kevan puke ave lang, kaike ta bang atumsi khei alam kevan lapen kapacharvo nang-nang. Lasi non ason monit atum IT akai ahut anuttin along ta angthek kedorep ajok avarsai padamde det nangji. Lapuson pulote monsam vang un po. Chelangdam lonang, Karbi atum ke kaike ta kedamtang apor ahut anta akhei tin pen ta dorapver, seta hala kedodorchit adim pek lote angkrak kelong pen angton kacheraiji aphan matha rong pen klem rong titi. Bangso ajok khei kacheraidun nangkok ajoksi charvo nangkok titi lo. Athe majok seta khei lapen ke longri aphan ke chingduk seta kaike ta masap alam pen khei alam kepn det titi ajoksi atemon keso nang-nang. Lasi non ason pangthek pen lole det nangji lapen angthek abang chebirtisi paklang nangji. Laso aphi ke media atum aphan ta ot pame nangji athe kedamtang apor ahut Dimasa aron, Chowkihola alam pen danglok ke ili thek prong lo. Lahai alam ili langdak lote long po, halahai adim along longri nang kehang pen Karbi aphan amat kiplungji lapem medu anta ke-en-en ajok pen kacherai dunji pu alam pensi kacharvo kecheng-cheng, seta bang atum abang publicity stunt aphan ardi kipi munak ajok bang atumsi pathak det titi. Lake 2003 aningkan Karbi-Kuki clash ahut ta inglong hanso aphuthaksi kacharvo pukok. Lasi non ke ove kimi atum video pen voice recording angthek kibi-bi asai keklem ke mepik lo lapen lapusonsi klem bom nang po lapen bangso amo pensi lapuson kaike khei alam kevan atum aphan expose bom nang po. Pini Bengali pen kachetong dunde ta isi kethetan alam lo lapen latumsi kechokche puke cheklangdak lo. Lasi non ason jongsi keklem parsik lo pulote khei along ke monsam van un po lapen khei lapen longri chingthur un po. Lasi hamphang asong atum Choudhory pen Dey atum aphan nepne tik ke kangkir che en eh pu kaningje dun rinti ke mesen lo athe lapuson jongsi tok-klong pulote Karbi atum adai ave pu abang ke klang po lapen mononphi aphanta mesen po.

IPC ateng pulote lapuson alam ke Section 124(A) Sedition charge lapen lake non bailable lapen arsik-o aron, seta kedamtang ahut bangso amonit high court pen kacheklem det asonsi non ta cheklem tahai, laso along khang dun nangji.