Jongsi
local atum chepangtangte te hithi kangpuji aphan apor nang jilang lapen
siksakji
Hithi kangkir
kache enji aphan administration atum bor-i pik lo lapen lamsam pen kether ta
dolo. Seta hamphang asong atum ta khei kachinghon angthek chepaklangsi Karbi
aphan kangton apot Karbi akhei aphan diya chohang nangji lapen diya hanghe tik
ke kangkir che en thekthe pu ningjethip lo. Hamphang asong atum, jasemet pen
KSA (Leeon) pen KSYC atum abang ke kachepangtang atum lo, seta akaprek asong
KFA atum pen danglok ke lasonsi ningjedun thip. Birta kelong ateng pulote latum
ke Karbi a richo kalite te longri asar athengno Karbi aron (Customary law)
ateng pen kove pum pho, bikron pak pho, hor ebong lapen tangka Sika krepho pusi
pu lo. Kecheng kachingvai arni ladak local a Bengali asongja atum ke kroilo
seta latum a high command, Guwahati atum abang kekroikre ajok chingthang pring
lo. Non ili kamunthi dam nangji abang ke latum latum diya chohangji ma? Neli
jungjung kamatha ke latum hanghe athe khei kethe lapen reset pu kachekrong atum
ke Karbi arum lut ingtungte. Jongsi diya hangdet pulote lake rat-det angno
Bengali si Karbi along diya kachohang pu alam ke klangdakji pu chematha po latum
klemkle det tahai. Bangso pen ajok chingthangpring po. Lasi, lason paklemvekji
pulote ladak kedo ajahak local Bengali ratchari asongja lapen song atum aphansi
than pame pen pakroi nang po. Bangso along bang latum a high command atum ke
nang kaningje dunchot ke joike, seta netum dak kedo atum ke sungkrungji pu
abangsi pabuji nangji athe mo dak pen latum be nangkok pulote kanahok lapen
kachilutji ke dak atum kedo a Bengali atum puke pachini pame nangji.
Laso pen aphi
non kachere nangji ke raikom atum pen kenep-kangnang dokok tahai lapen ajahak
aratchari lapen administration atum pen politics pathusi hamphang asong atum
aphan kapachethak asai klem tahai. Bangso along kapachetonte pen kapachili asai
klemsi pachekaklapji amo ta klem po. Lason along ke keklangdong lapen
kangtangrak asongja aphan ke arlen vek po. Lason asai keklem ke ASDC hemprek a
movement ahut pen danglok JACAS a movement lapen asongja atum aphan kosonsi
keklem ma ke thek prong lo. Lasi non pen lapuhai aphan kachisik mek ta do
nangji. Lason-son kepho asongja atum ahem-ari kelangpi lapen latum aphi karjap
dunji asongja (Second line leaders) chithik mek nang po. Bangso angbong jakong
(Raikom) pen hithi kangpu lapen kangkir angbong sorsuri kachivung aphan ta
chisik mek nangji. Lahai along kethetan rat ta kachisik ta do nangji athe dampri-dampro
along ta kepho nangne ason chetong nangkok ta thek. Lasi la amethang a gari pen
kedam lapen bus pen pusetame halaso aphan ta chisik mek nangji. Lasonsi rat pen
ratchari asong lapen asongja atum aphan ta khei along politics kapathu atum
aphan ta pangthek nang po. Lahai kado kave lang et pen jongsi aprang-prang
asong peace committee pen klem amat pangsam pulote lake malomso aphan anvet
liji, lasi kithirkluk a monsam aphansi matha nang po, seta la nang kethak a
politics pen ke chere pame pen chelangkrisi bangso aphan keberthipji aphan song
lapen songja atum cherok nangji.
No comments:
Post a Comment