Diphu ahithi katerekji apor lo
Diphu ahithi ke
district a head quarter pinak ajok kaike ta eson ma eson ke kachiki nangji asai
dokok. Athe ladak ke government saihem asai chot kali kachonam-choret anta
daksi dopet lo. Bangso angbong pen Diphu ahithi hen lo asai kethenai pule pudam
seta henone athe ke kachonam lapen kenangsot ason anta Diphu ahithi hen lo.
Ladak pensi Karbi atum beha ahin, pulonang kulat kachobi pen danglok ke
wholesales akulat amokha ke dak hithi arlosi dopet. Bangso amat Karbi Anglong
commercial hub ke Diphu ahithi hen lo. Pulonang, Diphu ahithi pensi Karbi atum
rongsopi arai kedo akulat ahormu kenam pen danglok, hem kikim ahormu, peh-ri,
han-sang heihui anta kachonam. Lahai ke Marwari, Bengali lapen Bihari atumsi
wholesales ke kibi. Bangso ajok Karbi Anglong a economy ke latum aridengsi
otthip lo. Lason titi ajok ajat ason puseta latumsi parideng po anke control
det titi. Ruidam lonnag, kedamtang Therepo niphai 29, 2012 arni lang-ok abeha
Abdul Khalekh alam pen Diphu ahithi kangkir pen atok malom kedo akulat atum ale
long lo seta Diphu ahithi kangpu pen ke hormu ador pabatsi kangkir esek ale che
en det lo. Lasi non lethot ta lapuson klemji lapen klemverji. Lasi Diphu ahithi
along kenangsot beha ason an ahithi ke lason thot wholesales ahithi Diphu
akaprek along kangpu akenangsot lo. Pulonang, Lorulangso, Rongkhelan, Birola
kalite Lumding atovar along kedo an a wholesale akulat sang, dal pen danglok
rod, cement mate hardware, kitchenware lapen kenangsot ason anta tangka kedodo
atum amethang ateng pen chelangsi ingpu nang po. Halaso ahithi along ke akaprek
kona aso lapen elam karjuje atum aphan ke pado longle det nangji. Lasonsi kenam
atum ta laso ahithi alongsi chenam rep nangji. Lason pulote methang a economy
mate chokam ta bat po. Lasi non Karbi Anglong arlo kethenai ke methang a
economy kacheselam hen lo. Ladak ke song chot kali rat akacheto hen lo
kenangsot kethenai lo. Bangso amo along KAAC pen ke hithi kaselampi, hem kikim
lapen ason-ason a license heihui kithikpi amo klem nang po. Lasonsi town
committee ta hithi kimi aphan ardi pi nang po. Lapuson keklem nangji ke Diphu
aphi Donkamokam kalite Hamren lapen aphi ke Balipathar pen Dokmoka hen lo. Bangso
amo along hamphang asong atum ta chingrom dun nangji seta kethenai lapen
akenangsotnai ke rat hen lo.
Non bangso amo
along beha ahin keklem along non kedobom atum arlo-arlo pen nang pasiksak
dunji, lasi bangso aphan chisikven nangji. Lasi bangso amo aphan mesen-mesen
beha klembang atum chingrumsi langchari nangji, seta hala beha ahin thang chini
dunde pin atum aphan ke ardi pi nangne. Laso along kacherap dun nangji ke,
jongsi un eh pulote angtan pen methang alam kekroi amonit aphan chevan pensi la
kedobom atum aphan beha lapen economy ahin pensi ber nangji, jakong pen kali.
Lason jongsi klem lo pulote latum kerem avan chodeng vek nangji. lasi non
kecheng ahut pen ke-ongdung a Marwari pen danglok ke contract lapen supply ahin
non kedambom ahut ason ke avarsai pipe det nang po. Lapu an jongsi klem pame
pulote ki un eh detji alam amatsi ave lo.
Nangli lam ahok ik'lo lapen neli ke kipuver alamlo. Seta kachingri kave lapen mo ephrang kasiksakji alam kachecharche ajok elitum kapangkre dobomlang. Neli ning oijin chenam.
ReplyDeletePuvoiphit seta kachepakeng aphan kabor'e ington ponpedet nangpo pusi ning arlo chibi ik'lo.
Nangliphan aKero nangpi ik'lo lapuson ketok ponthek apot.
KARDOM!
Ilitum ason kamatha atum jongsi chingrumbom-chingrumbom pulote mo isi a plateform pen succeed po, arnisi ma arnisi ke.... We should not loose hope ...... and keep on trying even by way of writing as well ... Thanks for the support ...
Delete