Karbi Anglong aratchari kechokche ajoksi Bengali atum ane kethe

Den Arong along inut Karbipi aphan Mithu Das (Pronab) kacholangrem ajoksi aning kipung arat thurpak pen ketheng kechok lo. Bangso pen ajok akopai kelangno areng keso abang ta apran dam lo. Lasonsi hala kephovek abangphu ta kopai langno nangsi akai arjon aphan isi kethetan kithirthip angpram pilo. Seta bangso along kechokche aphan abang kapapho ajok apran kedam nang ta chokche seta hala Bengali asong atum ta akaheno aphan kerai pen ajok khei-khei kacharvoji alam van lo. Lason kacheplang long ke Karbi Anglong arat kachethak lapen kachari atum kechokche ajok lo. Lahai atum aphan kaike ta vote bank pu chibi pen rai palonglorsi ane pathe lo. Lapuson keklem ajok kaike ta esonbak pulote khei alam kangthur. Lapuson amat kaike ta ratsi sung nang lo. Non lethot ta rat ta akechokche dokok lo athe apran padamjui lo, seta hala khei alam kevan abang ke akechok lo ma? Kaike lapuson amatsi rat ke aphong-aphong ha Kuki pen, Rengma pen Dimasa pen Adivasi pen Ahom pen lapen Bihari atum pen kamatha sung nang lo. Halahai ahut ke tangka kehang, kachebohong, longle kachithi pu heihui alam pensi lam kethe, seta non abang ke Karbi akhei amohorsi ke en lapen langplot pensi ahem ahemphu aphan chesong lo. Lahai along ke kachesong det atum le kechokche kali, ladak ke ha kecheng pen ili methang angbong isi vet kedo thekthe lapen kaike abe kidunrok ajok. Lasi kechokche lapen kethekthe a politics kapathu pensi khei aphan kaike pasung lo. Lahai ahut kaike ta malomso aphansi klem rinti rong, seta kithirthip aphan matha vangve lapen aning tengne dap ong-ong. Alam le kelam lote kamatha lapen keklem ta kelam lo. Bangso ajok kaike ta men-men paserek khok asonsi klem chotchat, lata hala ingnar vang tanglo hemtap kikim pu asonben titi. Pulonang, abatai-batai khei alam, ahoi alam lapen klempar alam pen batai ko an lo rat kisung dun nang? Kaike ta latumsi ahem-arit, akhi-adat lapen pran ta kedam dun nang, seta la songja pu kaike akechok pameme malomso aratchari kapathu pen kapangsam atum lapuson ahut pho dun ma? Jumpik atumsi phochotji, lata songjapo pu atum ke kejokpongsi ke-ong. Lasi Minority Appeasement pu asai keklem abang ingon nangji. Ahok methang akhei jongsi kechokche pulote lake ingsai nangji lapen methang hijan seta chingsai nangji, seta non ason-son aman kedamnang lapen kepho atum aphansi puthot kangton-kangthi lapen hotur kapinchong ke chok lo ma? Lasi non akai ke Karbi Anglong aratchari lapen ajahak hamphang asong lapen asongja atum aphan ning chethe move. Rat thurpak nangji lapen kenangsot pulote methang asongja lapen asong atum aphan amat ta kechokche anke nep nangji lapen ingsai nangji. Seta khei ke kaike ta khei lapen longri hijansi cherap nangji seta ha konatne angtan aso aphan ke kapacheplang longtar avarsai ke pipe det nangji. Lasi non la Donarong alam along abang ke kechokche aphuthak ingsai dunvek nangji.